یہ مانا جِسم مِٹّی کے جَہانوں میں بَنے ہیں

مَگَر رُخسار و لَب کِن کارخانوں میں بَنے ہیں

زَمِیں نے جَب مُجھے چھوڑا تھا مُشتِ اُسْتخواں تھا

یہ بال و پَر مِرے اُونچِی اُڑانوں میں بَنے ہیں

بَدَن اور رُوح کا یہ مَعْرَکہ ہَم سَر تو کرتے

ہَدَف لیکِن ہماری ہی کَمانوں میں بَنے ہیں

جُدا کرتے ہیں مُجھ کو آسْماں سے اور ماں سے

یہ کَیسے سِلسِلے گَندُم کے دانوں میں بَنے ہیں

کِرائے کے گھَروں میں زِندَگی کاٹی ہے اِظہار

کہ اَپنے گھَر ہَمارے، داستانوں میں بَنے ہیں